古惑老綿

年初一晚, 比人發老冷...
雖然唔開心左一晚, 但謝夫遇上有古惑老綿(死人Tommy改的)之稱的小羊, 你話結果會係點???
結果...小羊緊係唔洩底最後囉番個彩發佢脾四, 小羊險勝

悶蛋的大年初一

大年初一...今年又係屋企呆坐...
因為每年親人都在初二才來我家拜年, 加上昨晚沒有出外玩, 一點鐘己經上床訓教, 九點鐘便起床了...
今年的年初一特別清靜...沒有炮丈聲, 沒有醒獅...好像沒有甚麼過年氣氛...
唯一提醒我今日是年初一的...就是昨晚買下來的剪花福字貼...
我將它貼上大玻璃上...很靚...哈哈

Pako Lo Coming Back

嘻嘻! 知唔知Pako Lo係咩???
Pako Lo未即係我整既蘿蔔糕囉...上年我幫我整既蘿蔔糕改既名...

今年係第四年整Pako Lo, 今晚番去會整, 希望今年整到好食過上年啦。
仲記得上年整蘿蔔糕, 年三十晚一個人在廚房整, 感覺好寂寞;
唔知係咪因為咁o的蘿蔔糕有o的甘甘苦苦既味道...
上年雖然有少少失手, 不過都全部一日內沽清...
今晚整好話你知味道點....

Update on 23:50
登登登登...今年小羊Pako Lo己經面世啦, 三胞胎 ^_^ 味道同賣相都非常Very Good!!
小羊自評98分, 超正!!! 爭兩分就要睇埋煎既時候切同煮成點啦

側田事件

昨晚朋友借他剛買下的雜誌小羊看...封面是「側田M字額 xxxxx」
八卦的小羊見到封面題目咁有趣, 當然要看看內容...
內容大概是以側田的那個比蘇民峰更M的M字額... 以及在側田家門外的垃圾中那兩個避孕套...
小羊一邊看一邊笑...笑的不是側田的M字額...而是現在的Magazine的「豐富聯想力」

先論M字額, 竟然聯想到找「M字額」這名字始創者蘇民峰來講相學...
最抵死的是細標題為「M字額男咸濕 厚唇女大食」, 然後蘇民峰在細文中說...「邊有男人唔咸濕o家!?」

再論是那兩個避孕套, 先要向那個Chow人垃圾袋的記者致敬...執垃圾個個都有掃把用, 個個記者要用手仲要將o的垃圾當寶咁囉去化驗所...最抵死既係報告話個避孕套有一男一女既体液...用得避孕套, 緊係有一男一女既体液啦..., 洗唔洗比錢囉代垃圾去化驗所呀??? 佢prove到gay既又唔同講法...

不過都好, 起碼我朋友用十多元買本週刊, 我都笑左半個鐘。

討厭的"Dead"-sertation

自問不是讀書的料子...但好歹都要讀個「入場票」回來...
小羊出來社會工作不經不覺己經六年, 足足花了五年時間來買一張「入場票」, 還差兩個多月...我就畢業啦!
但在畢業前...還有份一萬字的Dissertation...

由於貪方便, 選擇了Sony Style做topic...但...愈寫愈亂七八糟...
為了迎合topic "Effectiveness of Marketing Strategy", 噤住良心講大話...
不停講o的樣好個樣好...但其實自知裡頭很多問題而且un-reasonable, 無sense又無point...

心知趕不切在新年假前交Literature Review同Methodology兩個chapters, 但又唔做唔得...
救命呀?????????
兄弟姐妹們, 如果你自問對寫論文有一手, 麻煩幫下小妹啦...

遺憾

昨晚知道有位知己的親人離世, 雖然我從未見過他的親友, 卻覺得為他有點難過...
除了有點婉惜, 大概也有點遺憾我不能為他做點甚麼...希望他快點回復心情吧

威士忌加冰..唔該!!

小羊昨晚第一次飲whisky, 加了soda...感覺: 無感覺, 水嗎????
大家都知小羊酒量麻麻, 但係昨晚和朋友們開了兩支HK$550的whisky(40%酒精)再加soda, 不知幾咁清醒。 遂不知平時酒量極好的謝夫又再一次...醉左!!

對上一次見到謝夫醉的時候, 小羊還未認識謝夫, 但是卻"先聞其聲"
話說在2003年11月HKMC的division dinner, 謝夫當是坐在隔離枱, 先在啤酒勁飲賽灌了2 杯大啤, 然後被shop的同事"隊"白酒, 再而紅酒, 其後是XO, 繼而Whisky...

醉左的謝夫卻跪在"那地亞"前不停講"對唔住對唔住..."
之後先是嘔在女同事的面上, 再而打了別的女同事一拳, 最後是打橫被抬出場地, 口流白泡不醒人事...哈哈

第二次見到謝夫醉左...小羊卻氣得要死...
今次是無厘頭的拍枱鬧人(當然他不敢鬧我, 找死麼?)...但事後清醒後卻忘記得一乾二淨...
本來是有點激氣, 但看到他貓了的樣子, 卻忍不住笑。

如果人生如酒醒, 能忘記一切糊鬧的事, 那多麼的好...
至少, 找不到半點不能忘記的證據

阿邊個邊個病左

阿邊個邊個講左五日training後前晚開始失聲, 雖則阿邊個邊個自己走去帶MASK, 但係又堅持自己無病喎...
點知琴日阿邊個邊個又請左一日病假無番工, 攪到阿邊個邊個個女朋友要推左朋友唔去史路比餐廳要走去照顧佢...
究竟阿邊個邊個係邊個呢?? 你估下?

阿邊個邊個病人菜單:
蕃茄薯仔紅衫魚湯 (亞姐切唔乾淨o的內臟, 攪到o的魚有少少苦)
蒜蓉白菜仔
白飯

夠竟有幾多????

好緊張好緊張...今日出知到今季bonus出幾多啦...
等等等...
Worldwide 同 AP既result己經出左...166% ...
唔知Country出幾多呢??? 我要等老細send email比我先知...
不過今季sales爭少少...未必出到咁多, 希望快o的有消息...

Updated: 失望呀...我個兩個country加埋得96%...少左成一大kur呀 ><

苦戰新力

這數天, 和前同事兼好朋友MSN, 因為她正考慮轉工, 但又不捨得離開;
她的處境, 數個月前我也曾經感受過, 感覺得確很矛盾, 很喜歡Sony這公司, 但卻覺得為自己有點不值,苦戰了一段時開, 最後卻沒辦法不離開。尤如一個女人, 很愛一個男人, 但男人沒有珍惜, 一直丟下女人自己一個, 苦戀一年, 這個女人只有放棄這種戀愛。

事實上, 我相信大多數的Sony同事(凡事總有例外的)也很用心的為公司出一分力, 但卻不是每一個人都得到應有的回報。少數的幸運兒或許可獲大老細「寵幸」,要風得風,要雨得雨, 但絕大部份的人包括以前的我, 也是得個做字。

值得安慰的是, 前同事們還是認同我的工作及辦事能力。可惜的是, 我的successor還是未能真正代替我的工作, 看著小羊努力的成果逐漸埋沒, 真的有點失望。

史路比餐廳開業通知

今日Eugenia通知我, 旺角登打士街開左間Snoopy餐廳, 睇相就好似好得意咁, 但唔知係咪真係咁靚呢? 小羊相約了Eugenia今個星期四晚去試下, 番黎報告比你地知!! 如果你都想去就call我地啦。

今晚要再做Gym減肥!! 但係我以家好肚餓...唔知食既卡路里會唔會多過做運動減既卡路里呢????? 有o的懷疑...

第十三個月糧出左啦...

但第十二個月仲未出 (月尾先出), 仲有今個月尾會出埋Querterly Bonus
今晚番去check下出左第十三個月出左幾錢先, pro-rata應該有五個月 ^_^

破紀錄

己經四個多月沒有做GYM, 昨日做了兩個小時, 今朝...痛死...
奇積出現...不懂肥的艾莉...竟然鎊出有95鎊重...記憶所及, 這是有史以來最重的個人紀錄...
足足重了五鎊 (其實會唔會係個鎊壞左呢????)
身邊的朋友或媽媽都說我肥了, 有些朋友說我肥了, 但比之前太瘦的時候好看一點...
幸好肥了的地方可以用運動和減少零食減肥, 面也不至於太過肥...

昨晚吃晚飯後, 撘巴士973遊巴士河, 入到赤柱, 然後再撘973回尖沙咀, 用了三個小時; 其實很開心遊巴士河, 只是不知是否今年身子不好, 似乎很容易暈車浪, 好在不至於嘔出來。

今日菜單:

今日菜單:
大眼雞滾節瓜湯 => 非常好味
火腿炒蛋及奄列 => 好味

3吋高踭鞋的考驗

小羊自從轉工五個月來都未穿過三吋高踭鞋...
就算在Sony時, 都係間唔中開會先會著...
今晚Annual Dinner, 今朝左整右整, 又將係鞋櫃放了一整年的高踭鞋拿來一著,
最後?? 結果未遟大到, 比平時遲了廿五分鐘才回到公司...
點解?? 因為就住就住黎行, 行到蟻咁慢囉!!

三吋踭, 你估易著o家, 著高踭係都係種學問...
小羊自問未到家, 著平底鞋都可以sin呔咬柴, 更何況三吋高踭鞋?!
最高難度莫過於著住三吋豆令踭追巴士... 我姑姐曾幾何時都做到, 仲要健步如飛...
睇黎小羊都要著多o的練習下...

趨婚(續集)

今日亞文同肥偉無啦啦約出黎食飯...
點知食食下...又問結婚問題...
老實講, 我無諗過佢地會問我o的個問題...
亞文同肥偉和我年紀相約, 他們是男性, 結婚o的個問題無理由咁早會諗...
但確實, 亞文己經打算儲錢結婚, 肥偉仲勁, 比未來外母叫買樓...
究竟時下亞爸亞媽係咪興趨婚呢???
品謙就唔洗講啦, 都同connie同居啦, 結婚都係遲早既事;
肥偉同佩儀都係同居...但會唔會結婚就未知之數, 好似仲有變數既機會
亞文同女友都係同居...儲得錢來都差唔多時候

結論: 點解個個都同居o家?!! 我仲係同屋企人住, 係咪有o的out呢??? 我又要...

考試又暫時離開我啦

經過兩日閉關...今日終於可以出關啦...
但係...成績...慘不忍睹...合格既機會率低於三十個巴仙...
不過己成過去...盡了力便算了...

現在餘下來的便是Dissertation的Chapter 3 & 4, 要在農曆假期前交...
希望舒舒服服唔頭痛就交到功課啦...

考完試, 出盡腦汁作文, 將所餘無幾既溫書記憶都搬出來...很累...
要好好累一覺...早抖

趨婚 一. 一

其實我個樣係咪開始老呢?!
點解每個人, 無論同事, 舊同事, 家人, 朋友, 同學, 舊同學...
都咁關心我幾時結婚??????

結婚...這兩個字, 的確不是壞事...
但是也不至於咁急吧??? 到現在, 我還很自豪自己能大聲說一句: 我只不過是25歲的後生女

或許大家都覺得像我這樣任性野蠻的皇帝女都有這樣好的謝夫照顧, 大家都恨不得快點嫁左我出去...尤其是媽媽當知道我和前任拍拖八年的男友分手後, 大概是一直擔心我嫁不去...
她曾對我說: 找對了, 便快點結婚, 不要拖那麼久?!!! (奇怪)

至於他的父母...大概是恨飲新抱茶恨到發燒流口水...
他爸爸前兩天非常異常的直接對我說, 請我父母出來飲茶...諗下擺幾多圍...聯婚好了... (一. 一)
第一個問題, uncle好似應該先問問他的兒子, 要逼, 都先逼他的兒子, 幹麼逼我???!!!!
第二個問題, uncle, 你好似見過我幾次左喎!?

父母擔心子女, 是理所當然... 但這世代這香港... 已經沒有"父母之命"這回事...
話到底, 我們自己及相方的經濟狀況, 意願, 打算, 困難只有我們最清楚...逼不來的...

2人份量減肥菜單

昨晚實驗成功的減肥菜單:
1) 豆腐草菇素菜羹 (評分: 90/100)
2) 冬菇絲蒸水蛋 (評分: 70/100, 有少少未夠熟)
3) 蠔油芥蘭 (評分: 99/100, 但無難度可言)
4) 白飯

北上遊記

元旦晚上十一時, 因為朋友們慶起, 一齊上大陸揼骨...
未曾上過大陸揼骨的大鄉里小羊, 做了腳部按摩 (真的幾舒服) 和 香薰推油,
感覺也自算不錯，只是給陌生人按摩有點不知所措．．．
第二朝離開，好難先找到一間酒樓，吃飽飽後週圍走走，乘了數個站的堔圳地鐵。不過開發後的堔圳，卻不是小羊想像中的好，反而覺得很悶很沒趣．．．
消費不平，質素不好，那裡賣的全是香港有得賣的數碼產品，機乎每一個商場都是賣電器．．．悶死．．．
最後三點己經按耐不全要走．．．
最後一站．．．厠所．．．卻領會出今次北上的最大結論．．．
結論：近幾年雖然往來堔圳香港愈黎愈方便，但是廁所間仍衝擊著兩地文化之差異；從香港來的，會自然的很規舉排隊等候。但每當有堔圳人入厠所，她們就算看見三四個女仕在排隊等候，但卻全無意織要排隊；當厠所門一開，便飛身進入厠格。一向敢言的香港女仕們當然也不甘示弱，破口大罵，但那堔圳亞婆卻一聲：「這裡是堔圳，不用排隊!!」

獅子山郊野公園

今年新年假特別覺得眼訓...
黑眼圈走哂出黎...

除夕下午 和朋友在獅子山郊野公園BBQ。
記憶中, 十五六年前的獅子山郊野公園BBQ是一遍草地, 怎麼現在郊野公園卻變成"公園附設燒烤場", 除了燒烤爐固定的燒烤爐, 還有指定燒烤區供市民自備燒烤爐燒烤... 但是...二十個自備燒烤爐位中, 基乎全都是在附近實惠買的, 可想言之, 這些爐絕大部份都會被棄置, 超級浪費...
另外, 原來以家霸爐要由上午七點開始霸, 還有霸爐新招;
BBQ當日大概2點, 每一個地方都滿了, 很好彩有位大叔問我們燒到幾點;
如果早的話, 他可以讓我們先燒, 八點交場給他...
原來他朝早七點便帶了兩個菲傭到那裡霸了兩個爐, 但問他何時開始燒, 答案竟然是, 下午九點...
最抵死係...不指菲傭, 他也同場在等...真浪費時間...

晚上在酒吧渡過了除夕...當然...嘻嘻...飲到wing左番屋企...